يالله يامنشـي مخايـيـل وبــروق = تسقـي البـلاد المسنيـات العتيقـه
ياواحـدٍ سـوى تفاصيـل وفـروق = في الكون يامنجي النفوس الغريقـه
وأذا نوى بأمر فلا هوب مسبوق = ماينشغل عن شأن خلقه دقيقه
تفرج علي قلب ٍ من الضيم محروق = من زود هاجوسه غدى فيـه ضيقـه
يرجي متى يصفيله الجـو ويـروق = رجوى الكسير تصير رجله طليقـه
مايقضي العـازات للخلـق مخلـوق = حيث العطا من عنـد رب الخليقـه
ارزاق من فوقك علي واحـدٍ فـوق = فـي دبرتـه كـلا يسيـر بطريقـه
يبو حمد مالي علـي مثلـك حقـوق = مادامنـي بالعيـن شفـت الحقيقـه
عاشرت ناس ٍ قلت وافين وصـدوق = ولقيتهـم مثـل السـراب وبريـقـه
ولقيت عندك للوفـا سلـم وطـروق = واكملت ماعنـد الصديـق لصديقـه
قلبي على لقيـاك يومي بـه الشـوق = لا شك كـلا لـه ضـروف ٍ تعيقـه
حلو الكرى من جانب العين مسروق = وهم ٍ لجى فـي خاطـري مايطيقـه
دنيا بها الانصاف ماهـوب ملحـوق = مايستـوي حـظ الشقيـق وشقيقـه
احدٍ صفاله شربهـا حـظ ووفـوق = واحدٍ على الما من الضمى جف ريقه
فلا تستمع الاخبار من غيـر ماثـوق =الا كـلام الـي علـومـه وثيـقـه
ولا ياخذك في ساقته كـل مطفـوق = يجني علـي نفسـه ويتعـب رفيقـه
الانذال في سلم الوفا مالهـم سـوق =والحر مـن صنفـه يشكـل فريقـه
تمضـي حياتـك ماتميـز لهـا ذوق =لا صار ماحولـك ربـوع ٍ شفيقـه
ولفض ٍ بلا معناه ماهـوب منطـوق =والصمت مايبري الجـروح العميقـه

مشتاق واهتزت شجوني من الشـوق = غواص بمـواج البحـور الغميقـه
سفاينـي نشـرت مقاويدهـا فـوق = قبطانهـا خـوف الغـرق مايعيقـه
يامرحبـا ً عـداد ماشعشـع بـروق = يشعـل سنـاه وراعـده يستسيـقـه
مثايل ٍ من ذوقهـا يعـرف الـذوق = اقوال مـن بالجـود جـدد طريقـه
الصقر وكره في شهاقيـق شهقـوق = محمـد المهـذل معـزز رفيـقـه
شروى محمد قط ماتعـرف البـوق =للصدق في صدقا الصديق لصديقـه
للحق نوفي طالب الطـاق مطبـوق = ناقـف وتلزمنـا الحقـوق الحقيقـه
والعايب نحطه ورا قفـل صنـدوق = نقبض لجامه ليـن يركـب وسيقـه
ناضت جروحي ولمناجاتـك اتـوق = وشرع بلا مشروع والله ماأطيقه
تصافقت بي صفق الأيام بصفوق =مثـل المشـاه ايعازهـا بالمسيـقـه
من جا على الذاري لحق ثوبه حروق = يعكس شعاع الشمس باسم الشقيقـه
آشق منه انشـق والقلـب مشقـوق = اظهـر بحـور وداخليهـا حريقـه
يانسمـة الافجـار يارايـق الـروق = ريح الزهر والنوب يسحب رحيقـه
الروح ريح ومالها شكل وعروق = بأي الجوارح تستكن الرشيقه
الله عسى ماينعكس بالجفا الشوق = عند المجرب بالتجارب طريقه